Litteræ A., prioris Sancti Pancracii, ad abbatem Cluniacensem, de excusatione pro absentia sua a capitulo generali.
Venerabili patri in Christo et domino H[ugoni], abbati Cluniacensi, frater A., minister humilis Sancti Pancratii de Lewes, obedientiam tam debitam quam devotam. Cum aput nos in diversis locis justiciarii itinerantes jam sedeant, et nos coram ipsis de terris et possessionibus causas habeamus et placita, quæ sine nobis prorsus expediri non possunt, paternitatem vestram humiliter et devote rogamus, quatinus absentiam nostram in capitulo generali habere velitis excusatam. Valeat paternitas vestra semper in Domino. Datum aput Lewes, anno gratiæ Mo CCo quadragesimo.